Bellach, mae gan "Yr Hen Garej", ag iddo enw addas, bluen arall yn ei het, gan ei fod yn cyflenwi gwydr lliw, yn adwerthu a cheir yno weithdy gyda thiwtoriaid. Yn yr Hen Garej, fe ddewch o hyd i bopeth sydd angen arnoch o ran gwydr lliw - ar gyfer amaturiaid a phobl broffesiynol. Maent yn cadw gwydr a wnaed â llaw o bedwar ban byd ynghyd â gwydr lliw mwy traddodiadol ac mewn arddull eglwys gadeiriol.

Sefydlodd Julie Farrington a Richard Sanders y busnes chwe mis yn ôl, a hynny wedi iddynt dderbyn gwobr Menter Amcan 1. Daw Richard o gefndir cyfrifiadurol, ac mae ganddo 25 mlynedd o brofiad fel dadansoddwr a rhaglennydd. Cyfarfu â Julie a bu i'w diddordeb hithau mewn cynhyrchu gwydr gael gafael ynddo.

Medd Julie,

"Fe ddechreuodd fel rhywbeth i'w wneud gyda'r hwyr ac fel hobi. Yna, adeiladodd Richard weithdy yn y gegin a dechreuais werthu darnau yn y gweithle. Oherwydd i'n cyflenwad gwydr ddod i ben un diwrnod, ac o glywed nad oedd unrhyw un yn yr ardal yn ei gyflenwi a bod y posibiliad agosaf 17 milltir i ffwrdd, penderfynasom agor ein siop gyflenwi gwydr ein hunain. Fodd bynnag, i fod o ddifrif am eiliad, ni, bellach, yw'r unig gyflenwyr yn y sir."

Dywed Richard,

"Rydym yn gwneud llawer o waith trwsio i bobl ac fel comisiwn. Y cais mwyaf anarferol oedd cynhyrchu landrofer melyn mewn gwydr lliw i rasiwr landrofers brwdfrydig. Rydym hefyd yn darparu cyrsiau a gynhelir drwy'r flwyddyn ar gyfer dechreuwyr a'r rheiny sy'n dymuno gwella eu sgiliau. Ceir gweithdy enfawr lawr grisiau, ac mae llawer o'r gwaith a wneir yn ystod y cyrsiau yn gwbl wych. Rydym hefyd yn llogi ein cyfleusterau i artistiaid."

Mae rhan o'r ganolfan wedi ei neilltuo ar gyfer hyrwyddo a gwerthu crefftwaith a wnaed gan artistiaid lleol, gan gynnwys crochenwaith, paentiadau, dodrefn, gwaith turnio, chwythu gwydr, canhwyllau a sebonau yn ogystal â gwydr lliw. Am ragor o fanylion, ewch at www.theoldgarage.co.uk neu ffoniwch 01970 880900.